मास्तरकी एक फरफट

नौकरी नव्हे 'चाकरीच.!' शंकाच न उरली !
तोंड दाबून बुक्क्यांचा मार... पार जिरली !
स्वप्ने 'भारत' घडवण्याची हवेतच विरली.!
शेतच चोरीला गेली, जिथे मी संस्कार पेरली !
कुठे हरवलाय 'माझा' विद्यार्थी ....
पण होय..... मी लाभार्थी !!

खिशातून करून हजारोंचा चुराडा !
करतोय मोकळा मी 'शिष्यवृत्तींचा' गराडा !
*सर्वांना शिक्षा* देऊन अखेर शाळेचा खुराडा!
रात्रंदिस संगणक पण पोर्टलच्या पोटात मुरडा !
माझाच कापूर जाळून 'माझीच' आरती ....
पण होय ..... मी लाभार्थी !!

भाजीपाला, सरपण घेऊन शाळेवर जातो !
'ऑनलाईन' माहिती भरायला *रेंज* पाहतो !
नोंदवहीत ग्रॅम - ग्रॅम चा हिशोब ठेवतो !
सगळी 'सर्कस' करून फक्त शिव्याच खातो !
'चव' चांगली तरी 'मीच' ठरतो स्वार्थी....
पण होय ..... मी लाभार्थी !!

'संचमान्यता' समजेना 'स्टाफ' उमजेना !
'विद्यार्थी' पोर्टल चा तर गुंताच सुटेना !
रात्र संगणकासमोर गेली दिवसा पण प्रश्न मिटेना !
बायको बोलते, 'माझ्या प्रियाला प्रीत कळेना !
'लाचारी' शब्दाचा 'मी' समानार्थी ....
पण होय ..... मी लाभार्थी !!

'ज्ञानरचनावाद' तुमचा मीच यशस्वी केला !
'प्रगत शाळांचा' पाया मीच रचला !
'शाळा सिद्धी' पण दणक्यात साजरा झाला !
कदाचित हाच 'उतावीळपणा' मलाच भोवला !
म्हणूनच हा २७/२ 'मलाच' विरुद्धार्थी ....
पण होय मी ..... लाभार्थी !!

'निकाल' काहीही लागो माणसे दुरावली !
माझेच प्रतिबिंबे मला सोडून गेली !
पाण्यात काठी मारण्याची तुम्ही चूक केली !
आज जरी उजाड माझी घरटी झाली !
माझ्याच घरी जरी 'मी' आज शरणार्थी !
पण होय मी ..... लाभार्थी !!

सोसण्या जुलूम मी थोडी छाती मोठीच केली !
तुमची ५६ तर माझी ५८ इंच फुगली !
संघर्षाची बीजे तुम्ही आमच्या मनात रोवली !
इतिहास उलटून पहा.. 'साहेब'.....
'सुलतानी' आम्हीच लोप पावली !
साक्षीला चंद्र, तारे अन धरती ....
पण होय मी ..... लाभार्थी !!

                --- *शरदचंद्र शहापुरकर*
                    *८४८४०३११११*